Helga 2. og 3. oktober 2004 var det lyd og låt i festsalen på Førde barneskule. Heile dagane gjekk med til øving fram mot den store konserten på søndagen med drill og det heile. Konserten var igjen eit steg på vegen mot deltaking på Sogn og Fjordane- meisterskapen til våren.

Det var ikkje fritt for at det var ein del såre lepper og trøytte hovud etter timar med intens trening på laurdagen. Men med godt stell frå kjøkkengjengen gjekk det an å leve med det. Søndag morgon starta alle på ny frisk, og sidan låt korpset berre betre og betre.

Klokka tre var som nemnt foreldre, søsken, tanter og onklar og alle andre korpselskarar innbydde til konsert. Då fekk vi sjå at dirigent Helga Lied Wyrtz hadde makta å forvandle saueflokken til eit orkester med glød, harmoni og regi. Musikkstykkja vart elegant knytt saman med små introduksjonar, og blant musikarane sto den ene fram etter den andre med solistnummer. Her måtte både den ene og den andre fram med lommetørklet og tørke augekroken. Også aspirantgruppa viste at sjølv om dei er litt få, har dei ambisjonar om å bidra sterkt når den tida kjem.

Heile konserten vart teken opp på video, og medlemmer av korpset kan tinge seg video-CD (S-VCD) i skjema ved sidan av. Ein stor takk til dirigant, musikarar og dugnadsfolk som fekk dette til!